Reklama ŭ padkastach
Prezientuju vašaj uvazie artykuł, jaki ja napisaŭ jašče ŭ červeni 2008 hoda jak dakład va ŭniversitet, pra toje, što takoje padkastynh, padkast-terminał i padkast. Padkastynh u zamiežžy j Biełarusi. Asablivaści padkastaŭ pry razhladańni ich jak reklamnaha nośbita.
Paśla kanferencyi DI.by, ja ŭzhadaŭ pra hety materyjał. Jon moža ŭžo j nia tak aktualny, ale ž navošta jamu ŭvieś čas, pakul ja jaho nia vydalu, lažać na pasłuhačach Google Docs? 
Tamu, čakaju vašych kamentaraŭ!
Što takoje padkastynh, padkast-terminał i padkast?
Termin byŭ upieršyniu ŭviedzieny va ŭžytak vi-džejem Adamam Kery (VJ Adam Curry) z muzyčnaha kanału MTV, i źjaŭlajecca składzienym z dźviuch častak słovam: ad nazvy iPod (viadomaha mp3-płejera kampanii Apple) dy anhielskaha słova broadcasting (šyrokaviaščańnie). Z dapamohaj hetaj technalohii kožny karystalnik Web, faktyčna, moža adčynić svaju radyjostancyju ŭ siecivie.
Padkastynh — heta sposab publikacyi medyja-strumieni (hukavoj abo videja) u siecivie (zvyčajna ŭ farmacie MP3), anansavańnie jakoj dazvalaje aŭtamatyzavać zahruzku novych vypuskaŭ na mp3-płejer ci inšy partatyŭny prajhravalnik (naprykład, dalikažak). Z hetaha vynikaje, što metavaja aŭdytoryja padkastynhaŭ — karystalniki piersanalnych kamputaraŭ, jakija majuć vychad u sieciva j majuć partatyŭnyja prystasavańni dla prajhravańnia huka. Padkastynh — heta karysnaja alternatyva radyjo dy telebačańniu, pakolki nie patrabuje licenzavańnie častot i dastupny ŭ luby zručny dla słuchača momant. Na siońniašni dzień niekatoryja radyjo i telestancyi publikujuć svaje padkasty (Svaboda, Niamieckaja Chvala, NTV).
Vyšej było zhadana pra anansavańnie, a lepšaja aŭtamatyzacyja budzie tady, kali padkast-słuchač ŭstaluje zručnaje dla jaho prahramnaje zabiaśpiačeńnie, (dla apieracyjnaj systemy na bazie GNU/Linux — Juice, BMPx, Amarok i inšyja, dla apieracyjnaj systemy Windows — Jucie, Ziepod i h.d), jakoje budzie pieryjadyčna zapytvać pasłuhač padkast-terminała ab novych hukazapisaŭ, jakija potym abo adrazu j ściahvajucca na kamputar abo partatyŭny płejer, abo pa žadańniu karystalnika, buduć ściahvacca paźniej, kali heta budzie zručna karystalniku persanalnaha kamputara.
Pad padkast-terminałam razumiejuć peŭnaje schovišča padkastaŭ, jakoje aŭtamatyzuje raźmiaščeńnie zapisaŭ i padpisku na abnaŭleńnie (praz RSS-stužku). Padkastam ža zaviecca abo asobny fajł-hukazapis, abo rehularna adnaŭlajemaja sieryja takich fajłaŭ, publikujemyja pa adnamu adrasu ŭ siecivie.
Padkastynh u zamiežžy
Amierykanskija daśledčyki — Arbitron dy eMarketer niezaležna adzin ad adnaho padličyli amierykanskuju aŭdytoryju słuchačoŭ padkastaŭ, na 2008 hod hetaja ličba skłała prykładna 25-27 miljonaŭ čałaviek, na budučaje hetaja ličba moža ŭzraści ŭdvaja ŭ 2010 hodzie. Asobna, eMarketer padličyła kolkaść vydatkaŭ na reklamu ŭ padkastach, tak za 2007 hod jany skłali 80 miljonaŭ dalaraŭ, vierahodnaja ličba na 2010 hod — 300 miljonaŭ dalaraŭ.
Miž inšym, całkam spravazdaču apošniaha daśledčyka možna zamović pa elektronnaj pošcie abo zvyčajnaj pošcie z dapamohaj FedEx servisu za 695 dalaraŭ, što paduśviedamlaje surjozny dy pierśpiektyŭny nakirunak dla reklamščykaŭ. Ab perśpiektyŭnaści padkastaŭ moža śviedčyć nastupnaje — 87 adsotkaŭ internet-karystalnikaŭ pakul nia viedajuć uvohule, što takoje padkast.
Padkastynh u Biełarusi
Što datyčycca Biełarusi, dyk tut usio davoli sumna. Pa nazirańniach, ŭsio, što źviazana z siecivam u Biełarusi značna adstaje, hadoŭ na 5-6 ad zachodnich krain. Adnosna padkastaŭ, pa majmu ŭłasnamu miarkavańniu, samaje cikavaje, što ich adsutnaść źviazana nia z tym, što niama techničnych srodkaŭ kštałtu padkast-terminałaŭ, a z tym, što adsutničaje ŭvohule cikavaść da padkastaŭ. Tak, u Biełarusi pracavaŭ padkast-terminał — podcasting.by, ale pracavaŭ niašmat času, bo nia byŭ zapatrabavany.
Ale było b hłupstvam kazać, što biełaruskich padkastaŭ niama — jany jość, ale z boku reklamščykaŭ jany zdajucca daremnymi vybytkami, bo jašče nie sfarmavana aŭdytoryja biełaruskich padkast-słuchačoŭ.
Asablivaści padkastaŭ
Pad asablivaściami ja razhladaju parady Hrehara Hałanta, uładalnika i kiroŭcy kampanii RadioTail, jakaja specyjalizujecca na reklamie ŭ padkastach.
- Prytrymlivacca nievialičkich pa času reklamnych paviedamleńniaŭ
Daśledčyki padkast-słuchačoŭ vyznačyli, što lepiej za ŭsio vykarystoŭvać 15 siekundnyja reklamnyja paviedamleńni, bo mienavita takija pa času paviedamleńni značna pamiańšajuć stymuł słuchačoŭ da pieraklučeńnia svaich płejeraŭ ŭ režym chutkaha prajhravańnia. Dyj potym, ścisłaść — siastra talentu. A kali nieabchodna ŭsio ž taki 60 siekund, kab raspavieści pra pieravahi reklamujemaha pradukta, dyk lepiej vykarystać dla hetaha čatyry 15-siekundnyja kavałački na praciahu ŭsiaho padkastu.
- Zdolnaść da tvorčaści
Navat kali słuchačy nie pratestujuć suprać karotkich, stvoranych z hustam paviedamleńniaŭ, jany ŭsio ž taki buduć suprać taho, kab słuchać adzinaje karotkaje paviedamleńnie šmat razoŭ. Tamu stvarajcie jak maha bolš niepadobnych adno na druhoje paviedamleńni, kab nie stamić słuchača adnymi j tymi ž paviedamleńniami.
- Niedaacenka aŭdytoryi — “što dla radyjo dobra, dla padkastu śmierć”.
Pačnu z prykładu — adzin viadomy pastaŭščyk internet-pasłuh daŭ reklamnaje paviedamleńnie ŭ niekatorych padkastach, jakija specyjalizavalisia na technalohijach i čyi słuchačy daskanała viedali takija paniaćci jak RSS, svabodnaje PZ dy sieciavy niejtralitet. U hetym paviedamleńni było vielmi padrabiazna raspaviedziena pra pasłuhi, jakija pradastaŭlaje hety pastaŭščyk, adnak voś hetaja padrabiaznaść była rasceniena padkast-słuchačami jak ździek kštałtu taho, što jany małyja dzieci. Vidavočna, što hetaje paviedamleńnie było nakiravana na ahulnuju aŭdytoryju — jak i robiać u radyjoindustryi, bo ahulnaja aŭdytoryja mała što viedaje ab novych technalohijach, i tamu davoli zrazumieła pazycyja reklamščyka, jaki ŭ reklamnym tekście padrabiazna raśpisaŭ usie pracesy.
Havoračy pra padkasty, my pavinny pamiatać, što padkasty ściahvajucca pa žadańniu, i tamu vypadkovy čałaviek naŭradcie budzie ściahvać padkast pra toje, ab čym jon mała viedaje ŭvohule. I jašče adzin prykład — Nikon Coolpix Camera dobra viedajučy, jakaja aŭdytoryja pačuje jaje reklamu ŭ padkastach, anansavała svaju fotakamieru, chucieńka zaznačyŭšy, što pieradača fotazdymkaŭ prachodzić pa radyjočastotach. — Reklama mieła pośpiech!
- Adkul pačać?
Reklamnyja paviedamleńni, raźmieščannyja ŭ padkaście pierad pačatkam zapisu słuchačam vielmi nie padabajucca, j tamu jany navat nia słuchajuć dalej sam padkast. Z-za hetaha šmat jakija padkast-pradziusary admaŭlajucca ad takoj reklamy. Akramia hetaha, taki padychod pahražaje imidžu reklamadaciela, bo padkast-słuchačy vierahodniej za ŭsio jašče nie paśpieli pakłaści svoj płejer u kišeń, tamu z lohkaściu mohuć paskoryć prajhravańnie, kab prapuścić niedarečna raźmieščany reklamny rolik.
- Zaasiarodźcie ŭvahu na kantencie, a nie na słuchačach
Paraŭnoŭvajučy radyjo dy padkasty, davoli lohka źviarnuć uvahu na toje, što kali dla radyjo ŭvahu słuchača nieabchodna uvieś čas “zavajoŭvać”, dyk dla padkastu hetaje nia vielmi aktualna z-za taho, što słuchač padkastaŭ užo padpisaŭsia dy pačaŭ ściahvać padkasty, inšymi słovami, jaho ŭžo cikavić tematyka.
Dzjakuj za ŭvahu!