Siaržuk Piatroŭski

1 listapada a pałovie na 22 hadzinu va uročyščy Kurapaty hramadzkija aktyvisty zatrymali dvuch maładzionaŭ, jakija łamali kryžy.

Paśla aktaŭ vandalizmu napačatku tydnia hramadzkija aktyvisty kantralavali ŭročyšča. Jak paviedamiŭ adzin ź aktyvistaŭ, jon i jahony siabra patrulavali ŭročyšča i pabačyli dvuch maładzionaŭ, jakija padyšli da kryžoŭ i pačali ich łamać. Jana pavalili i złamali piać kryžoŭ. Hramadzkija aktyvisty zatrymali ich i vyklikali supracoŭnikaŭ milicyi Mienskaha rajonnaha addziełu ŭnutranych spravaŭ.

Pavodle aktyvista, vandały byli niećviarozyja, niecenzurna łajalisia. Pakul čakali pryjeźdu milicyi, chłopcy vyklikali svaich baćkoŭ.

Pryjechała maci adnaho ź ich i ŭhavorvała milicyjantaŭ nie zatrymlivać jaje syna, bo jon niepaŭnahadovy. Paśla zvankoŭ chłopcaŭ pryjechali taksama niekalki mužčynaŭ, ale jany nie pradstavilisia.

Supracoŭniki milicyi razam z zatrymanymi vandałami i dvuma hramadzkimi aktyvistami ŭ jakaści śviedak nakiravalisia ŭ addzieł milicyi ŭ Baraŭlanach.

U 23.30 u Kurapatach pryjechali kiraŭniki Kanservatyŭna-Chryścijanskaj partyi BNF Juraś Bieleńki i Valer Bujvał. U ich prysutnaści kryminalisty pravodzili śledčyja dziejańni.

“Adbyłosia toje, što pavinna było adbycca, jany pavinny byli być zatrymanyja. Napiaredadni Dziadoŭ heta znak Božy, kali ŭvaha ludziej źviernuta da Kurapataŭ, da Dnia pamiaci prodkaŭ”, -— skazaŭ Juraś Bieleńki.

Heta nia pieršyja vypadki vandalizmu va ŭročyščy Kurapaty, dzie ŭ 1937—1941 hadach karniki NKVD rasstralali pavodle roznych padlikaŭ ad 40 da 200 tysiač čałaviek.

Pry kancy 1990-ch hadoŭ pałamali tabličku na kryžy „Pakutnikam Biełarusi”.

Što da memaryjalnaha znaku „Ad narodu ZŠA narodu Biełarusi dziela pamiaci”, to było dvanaccać vypadkaŭ vandalizmu. U 2002 hodzie adramantavanuju katory ŭžo raz łavu Klintana ŭstaloŭvaŭ u Kurapatach ambasadar ZŠA ŭ Biełarusi Majkł Kozak.

U śniežni 2005 hodu nieviadomyja vandały dvojčy apahanili svastykaj i sataninskimi nadpisami kurapackija kryžy, pomnik zahinułym va ŭročyščy habrejam i vyjavu Maci božaj Kurapackaj mastaka Alaksieja Maračkina. Nia raz łamali i kryžy. Pavodle faktaŭ vandalizmu ŭ Kurapatach zavodzili kryminalnyja spravy, adnak złačyncaŭ nikoli nie znachodzili. Letaś napiaredadni Dziadoŭ byŭ pałamany Kryž Pakuty, aktyvisty KCHP BNF adnavili jaho.

Hramadzkaść źviarnułasia da ŭładaŭ z zaklikam zabiaśpiečyć achovu ŭročyšča Kurapaty, jakoje źjaŭlajecca histaryčna-kulturnaj kaštoŭnaściu pieršaj katehoryi. Adnak u adkaz upraŭleńnie ŭnutranych spravaŭ Mienskaj vobłaści prapanavała arhkamitetu dziela ŭšanavańnia pamiaci achviaraŭ stalinskich represijaŭ płacić za achovu ŭročyšča Kurapaty.

Nahadajem, što 2 listapada ŭ Miensku projdzie akcyja, prymierkavanaja da „Dziadoŭ” – Dnia pamiaci prodkaŭ.